Најчеста дилема и пропуст при дефинирањето на начинот на доделување на договорот за јавна набавка во тендерските документации е “изборот“ помеѓу договор за јавна набавка или рамковна спогодба .
Зошто го потенцираме ова прашање ?
Повеќето од договорните органи кога започнуваат со спроведување на одредена постапка за јавна набавка, нејчесто како начин на доделување на договорот, го избираат доделување на договор за јавна набавка, наспроти изборот на рамковна спогодба.
Но што доколку се доделува договор за јавна набавка?
Доделувањето на договорот за јавна набавка претпоставува дека договорниот орган ја знае или може да ја испланира точната количина која ќе му биде потребна за задоволување на неговата потреба. Но, често во праксата не можеме точно и прецизно да ја предвидиме точната количина која ќе му биде потребна на договорниот орган.
Што во таков случај ?
Законодавецот предвидел дека токму во ваков случај, договорниот орган треба да ја употребува рамковната спогодба, како посебен начин на доделување на договори за јавни набавки. Изборот на договорниот орган доколку употребува рамковна спогодба, може да се направи помеѓу рамковна спогодба доделена на еден економски оператор и повеќе економски оператори. Доколку рамковната спогодба се доделува на повеќе економски оператори, начинот на доделување на поединечните договори за јавни набавки, може да биде без повторно прибирање на понуди, со повторно прибирање на понуди или со комбинација од двете горенаведените.
Кои се дилемите и грешките поврзани со договорите за јавни набавки ?
Договорот за јавна набавка треба да ги има сите суштински елементи кои ги предвидува законот, а еден од битните елементи претставува и точно определената количина на предметот на јавната набавка. Доколку овој елемент не е точно дефиниран или пак не сте во можност да го испланирате, тогаш најсоодветно е да размислувате за примена на рамковна спогодба.
Одредбите кои се употребуваат во тендерската документација од типот „Договорниот орган го задржува правото да не ја нарача во целост количината предвидена во договорот“ или пак „Договорот ќе се извршува сукцесивно по потреба на договорниот орган, а договорниот орган го задржува правото да не ја нарача во целост количината предвидена во договорот“ и слични, не се во согласност со законот за јавни набавки. Имено, начинот на избор помеѓу доделување на договор за јавна набавка и рамковна спогодба можете лесно да го одредите врз основа на тоа дали ја знаете или пак дали можете да ја предвидите точната количина .
Зошто т.н „Сукцесивен договор со ориентациони количини“ не се во согласност со законот за јавни набавки ?
- На економскиот оператор му се одзема правото на правна заштита по однос на секое доделување на поединечен договор за јавна набавка.
- Можноста за одредување на цени на понудата врз основа на точно определени количини на набавката, како што предвидува договорот.
- Договорниот орган не ги испланирал своите потреби во согласност со овој закон
и др.
Со оваа кратка статија сакаме да ве мотивираме на дискусија и размена на Вашите мислења и ставови по однос на горенаведената тема.
Со почит.