Изработката на тендерската документација е од исклучителна важност за успешноста на постапката за јавна набавка, а потребниот ангажман за нејзина изработка е исклучително голем. Имајќи ги предвид динамичните околности со промените на цените на различни предмети на набавка, а со цел да понудиме почетна основа за разработка на различни можности за корекција на цени, се потрудивме да изработиме Модел на применливи одредби за корекција на цени во тендерските документации.
Еве еден практичен пример за предвидена можност за КОРЕКЦИЈА НА ЦЕНИ во тендерската документација:
КОРЕКЦИЈА (ИЗМЕНА) НА ЦЕНИ
Договорниот орган со оваа тендерска документација предвидува корекција (измена) на цени во време на реализација на Договорот за јавна набавка. Корекцијата (измена) на цените ќе се изврши во согласност со следната методологија.
МЕТОДОЛОГИЈА
НА КОРЕКЦИЈА НА ЦЕНИ
ОПИС НА ПРИРОДА НА КОРЕКЦИЈА
Секоја корекција (измена) на цената (зголемување или намалување) на одредена позиција од предметот на набавка, која измена е резултат на околности кои носителот на набавка не можел да ги предвиди во моментот на поднесување на понудата и како такви не можат да му се припишат за пропуст, ќе се смета за оправдана. Измената која е резултат на промена на цените на релевантниот пазар поврзан со предметот на набавка, а имајќи ја предвид неговата развиеност и условите во оваа тендерска документација, се смета за оправдана.
ОБЕМ НА ИЗМЕНУВАЊЕ
Минималниот праг на измена на цената (зголемување или намалување) е 5% од понудената цена, а секоја измена под минималниот праг не е дозволена. Комулативните измени кои надминуваат 5% од понудената цена, можат да бидат основ за измена на цената.
Максимален праг на измена на цената (зголемување или намалување) е 20% од понудената цена, а секоја измена над максималниот праг не е дозволена. Максималниот праг се однесува и на комулативни измени на цената.
УСЛОВИ
А) Право на користење на измена на цената
Било која договорна страна има право да побара корекција (измена) на цената и истото го прави по писмен пат, при што задолжително доставува Барање за корекција (измена) на цената.
Б) Докажување на измените
За релевантен доказ ќе се смета секој документ со кој бараната измена на цената (зголемување или намалување) на одредена стока предмет на набавка, ќе се докаже дека е резултат на околности кои носителот на набавка не можел да ги предвиди во моментот на поднесување на понудата и како такви не можат да му се припишат за пропуст. Секоја промена на цените на релевантниот пазар поврзан со предметот на набавка, имајќи ја предвид неговата развиеност и условите во оваа тендерска документација, која ќе се докаже со соодветен релевантен доказ се смета за оправдана.
Напомена: Како релевантни докази ќе се сметаат исклучиво официјални јавни податоци од: Државен завод за статистика, Службен весник на РСМ, Меѓународно верификувани берзански податоци и други релевантни извори на пазарни цени .
В) Содржина на барањето за измена
Со барањето за корекција се доставуваат и податоци за обемот на промената/те кои не смеат да бидат помали од минималниот и поголеми од максималниот праг на измена. Барањето за измена мора да содржи прилог од релевантниот доказ за промена. Договорниот орган може да го одбие барањето за корекција на цена во случај доколку процени дека промената ќе доведе до суштинска промена на природата на договорот за јавна набавка или доколку не се исполнети во целост условите за изменување.
Г) Измена на договор за јавна набавка
За секоја оправдана измена, двете договорни страни согласно член 119 став 1 алинеја 1 од Законот за јавни набавки Службен Весник бр.24/2019, ќе пристапат кон склучување на Измена на договорот за јавна набавка во време на негова важност.
НАПОМЕНА: Овој Модел може да послужи исклучиво само како Пример и сам по себе нема и не може да има употребна вредност без негово дополнително прилагодување и усогласување со потребите на договорните органи.